تاریخچه

د اقتصاد پوهنځی د سهیل لویدیزي حوزې او د هيواد د اړتیاوو او د موجوده اقتصادي ستونزو د حل له پاره د کرهڼي، طب، انجینري، ښوونه او روزنه او شرعیاتو پوهنځیو څخه وروسته په(۱۳۸۸ل.)کال کي تاسیس سو او په (۱۳۸۹ل.) کال کي د پوهنتون په تشکيل کي شامل، چي په لومړي سر کي یوازي د منجمنټ او تشبثاتو اداري څانګه فعاله سوه او په تدریس ئې پیل وکړ.اقتصاد پوهنځی د لمړي ځل له پاره په (۱۳۸۹ل.) کال کي د لوړوزده کړو وزارت د کانکور ازمویني له لاري (۱۱۷) تنه محصلان اقتصاد پوهنځی ته معرفي سول.د پوهنتون د مشرتابه د هلو ځلو او زیار په پایله کي د اقتصاد پوهنځی له پاره په (۱۳۹۱ل.) کال کي تعمیر جوړ او د ګټي اخستني له پاره چمتو سو.دغه پوهنځی د تاسیس څخه وروسته په پرله پسې توګه په مختلفو څانګو کي محصلان جذب کړي دي، چي تر اوس مهاله پنځه دوري فارغان ټولني ته د خدمت له پاره وړاندي کړي دي. همدارنګه دغه پوهنځی د شپې برخه هم لري. په (۱۳۹۲ل.) کال کي د اقتصاد شپې پوهنځی منظور او د (۵۵) تنو محصلانو په جذب سره ئې په تدریس پیل وکړ، چي اوس مهال د اقتصاد پوهنځی دوه وخته (ورځي او شپې) له خوا په دوو څانګو ( ملي اقتصاد او د منجمنټ او تشبثاتو ادارې) کي محصلانو ته تدريس کوي،اقتصاد پوهنځی پنځه فعالي څانګي لري، چي عبارت دي له منجمنټ او تشبثاتو ادارې څانګه، ملي اقتصاد څانګه، انترپرونیورشیپ څانګه، مالي او بانکي څانګه او د احصائیه او اکونومتري څانګه.اقتصاد پوهنځی يوازي له دوو څانګو څخه فارغان ورکوي او پاته دري څانګي د ظرفیت لوړوني په حالت کي قرار لري.سربیره پر دې د عامه ادارې او منجمينټ د انیستیوت (۱۴ پاس) څخه فارغ سوي محصلان هم دوهم ټولګۍ ته د کانکور د ازمویني له لار جذبوي.د اقتصاد پوهنځی اوس مهال (۲۲) تنه استادان لري، چي د هغه جملې څخه (۱۰) تنه ماسټران دي. او(۱۱) تنه د ماسټري له پاره او یو تن د دوکتورا د تحصيلاتو له پاره د هیواد څخه دباندي تللي او په خپلو زده کړو بوخت دي.

لیرلید:

د اقتصاد پوهنځی به په ملي او سیمه اېزه کچه د اقتصاد په اړوندو څانګو کي مسلکي او په کار پوه فارغانو په روزلو سره سیاله پوهنځی واوسي.

رسالت:

اقتصاد پوهنځی د معیاري تحصیلي نصاب په درلودلو سره، په ملي اقتصاد، احصائیه، بانکدارۍ، اینټرپرېنیورشیپ او مدیریت برخو کي د ټولني د اړتیا او د سیمي د کاري بازار مطابق په کار پوه او وړ تحلیلوونکي او نوښتګر محصلان روزي. اهداف:

د ټولني د اقتصادي اړتياوو په نظر کي نيول سره د تقاضا او عرضې تشخيصول.

د استادانو، اداري کارمندانو او محصلانو علمي او مسلکي وړتيا لوړول.

په هر اقتصادي سيستم کي د سالمو او اړينو حالتونو تشخيصول.

د مرکزي بانک او دولتي پاليسیو په اقتصادي اهميت باندي پوهېدل.

د احصائيوي او رياضيکي ماډلونو څخه په استفادې د اقتصادي ستونزو تحليلول او تعريفول

اساسي ارزښتونه

  1. د پوهي ايجاد او لاسته راوړنه
  2. د پوهي پلي کوونه
  3. مسليکتوب
  4. همکاره او حمايوي اکادميک چاپيريال
  5. د پوهي ساتنه او انتشار
  6. د حقايقو پلټنه
  7. فکري همږغي
  8. د نظرياتو انتقال
  9. اوږدمهاله زده کړه
  10. فکري آزادي
  11. څېړنيزي چاري