د کمپیوټر زده کړي، له کورس څخه ۱۳۰ محصلان فارغه او د خاصو مراسمو په ترڅ کښي فراغت لیکونه ورکول سول
د شنبې په ورځ، د کندهار پوهنتون د غونډو په عمومي تالار کښي، د کمپیوټر مدیرت او آفیس زده کړي له پروکرامو څخه ۱۳۰ محصلان له دوه میاشتني زده کړو وروسته فارغه سول، چي په همدې موخه د محصلانو د خدماتو او انسجام آمریت د فراغت شانداره مراسم ور ته جوړ کړي ول، چي پکښي د کندهار مسئولان او سلونه محصلان حاضر ول.
په همدې موخه جوړه سوې غونډه، چي د قرآن کریم د څو مبارکو آیاتو په تلاوتولو پېله سوه، په سر کښي د کندهار پوهنتون رئېس م.اکرم شاه عاصم ټولو فارغانو ته مبارکي وویله، د کمپیوټر زده کړي د ارزښت د بیانولو ترڅنګ ئې په خپلو خبرو کي وویل: اوس الحمدالله؛ الله جلجلاله ټولو ته د ښه خدمت کولو زمینه برابره کړې، راسئ ځوانانو ټول په ګډه د نظام، هیواد او ټولني پرمختګ ته ملا وتړو او ټول ېو او بل ته د ورورولۍ لاسونه سره ورکړو.
ورپسې د کندهار پوهنتون د محصلانو چارو مرستیال م. نور احمد ایوبي تېر ېو کال کښي، د پوهنتون په سطحه د خپلو فعالیتو او لاسته راوړنو راپور شریک کړل، چي په خبره ئې، تېر کال کښي زرونه محصلانو ته مختلف علمي او مسلکي د ظرفیت لوړوني سیمینارونه او ورکشاپونه دائر سوي، او هم ئې دوی ته، د علمي سېر کولو، د عملي کارو او په ورزشي برخو کښي بېلابېلي آسانتیاوي رامنځ ته کړيو چي لا به هم دا لړۍ ادامه ولري.
د ویناؤ وروسته، ټولو فارغو سوو محصلانو ته د فراغت تصدیق پاڼي ورکړل سوې او غونډه د دؤعا په کولو سره پای ته ورسېدله.