په کندهار ولایت کښي د میدان سبز فوټسال ټورنمنټ پېل سو
د کندهار پوهنتون، د کرنیزو علومو او ټکنالوژۍ ملي پوهنتون، خصوصي لوړو زده کړو مؤسسو او د خصوصي او دولتي ښوونځیو تر منځ؛ په کندهار ولایت کښي (د نشه یي توکو سره د مبارزې) په نامه ټورنمینټ پېل سو.
د یاد ټورنمنټ ټولي بازۍ په ګروپي ډول د لیګ او ناک اوټ په سیسټم ترسره کیږي، چي د ۱۴۰۲ل.کال د مېزان مياشتي پر (۱۷مه) نېټه پېل سوی؛ د راتلونکي عقرب مياشتي تر (۹مي) نېټې پوري به دوام وکړي او ټولي بازۍ د ماپښين له خوا د ملالۍ لوړو زده کړو مؤسسې د فوټبال په لوبغالي کي ترسره کيږي.
د کندهار پوهنتون ستورو لوبډلي لومړۍ بازي په ګروپي پړاو کي د تېمور شاهي عالي لېسې لوبډلي سره ترسره سوه، چي صفر د صفر په مقابل کي پای ته ورسېده.
د یادوني وړ ده، چي د کندهار پوهنتون دوهمه بازي به نن د دوشنبې په ورځ له احمدشاه بابا عالي لېسې لوبډلي سره په یاد لوبغالي کي ترسره سي.