د سُهېل لوېدیځ زون په کچه د امارتي او خصوصي پوهنتونو محصلانو ته اووه ورځنی دیني سیمینار پای ته ورسېد
په کندهار پوهنتون کي، د لوړو زده کړو وزارت په ځانګړې لارښوونه او د یاد وزارت د دعوت او ارشاد ریاست په هڅو، د سُهېل لوېدیځ زون په کچه د لسو (١٠) امارتي او خصوصي پوهنتونو: کندهار، اناسټو، هلمند، نیمروز، فراه، ميروېس نیکه، ملالۍ، سبا، بېنوا او لمر ٥٥٠ محصلانو ته اووه ورځنی دیني سیمینار پای ته ورسېد، چي د وروستۍ ورځي په مراسمو کي ئې د لوړو زده کړو وزارت قدرمن وزیر شیخ الحدیث والتفسیر مولوي نداء محمد ندیم صاحب، د کندهار پوهنتون قدرمن رئېس الحاج شیخ مولوي عبدالرحمن طیبي صاحب، د لوړو زده کړو وزارت د دعوت او ارشاد ریاست رئېس محترم شیخ مولوي حکمت الله حکمت او ورسره مل محترم علماءکرام، د بېلابېلو امارتي ریاستو مسئولان او د هيواد مشهور علماءکرام، د امارتي او خصوصي پوهنتونو د محصلانو چارو مرستیالان، د دعوت او ارشاد آمران، د کندهار پوهنتون د پوهنځيو رئېسان او سوونه (سلګونه) استادان، کارمندان او محصلان حاضر ول.
د وروستۍ ورځي سیمینار چي د سهار پر ۷ بجو د قرآن کریم د څو مبارکو آیاتو په تلاوتولو سره پېل سو، په سر کي د کندهار پوهنتون قدرمن رئېس الحاج شیخ مولوي عبدالرحمن طیبي صاحب، د ناسمو رواجو د مخنیوي په هکله د عالیقدرامیرالمؤمنین حفظه الله تعالی د فرمان اړوند ځیني مادې په تفصیل سره بیان کړې.
وروسته د افغانستان د اسلامي امارت د لوړو زده کړو وزارت قدرمن وزیر شیخ الحدیث والتفسیر مولوي نداء محمد ندیم صاحب خپله وینا وکړه؛ هغه د ټولو محصلانو څخه مننه وکړه، چي تر پایه ئې په سیمینار کي ګډون وکړ او ياد سیمینار ته ئې په اشاره وویل: په دې ډول دیني مجالسو کي ګډون کول زموږ ایمان تازه کوي، زړونه مو قوت مومي، خپلو اعمالو ته لا متوجه کېږو، دغه راز الله تعالی مو ګناهونه رابخښي او الله تعالی ته لا رجوع کوو.
شیخ صاحب د خپلو خبرو پر مهال د علماءکرامو ارزښت په ټولنه کي بیان کړ او وې ویل: لکه څنګه چي ېوه سخته ناروغي د ماهرو ډاکټرانو درملني ته اړتیا لري؛ همداسي ټولنه د علماءکرامو لارښووني او علم ته اړتیا لري؛ علماءکرام د دین ساتونکي دي او په تاریخ کي ئې د الله تعالی له دین، کتاب او نبوي سنتو څخه دفاع کړې ده او دغه علماءکرام دي، چي دین ته ئې بقا ورکړې او تر موږ او تاسو ئې را رسولی؛ نو په کار ده، چي د خپلو علماءکرامو ټول اقوال په زړه کي وساتو او عمل په وکړو.
قدرمن شیخ صاحب محصلانو ته په خطاب کي وویل: که غواړی هم په دؤنیا او هم په آخرت کي سرلوړي ترلاسه کړی؛ نو په دواړو علومو ــ دیني او عصري ــ ځانونه ښه سمبال کړئ؛ څونه ښه خوند کوي، چي ېو څوک هم ډاکټر یا انجينېر يي او په عین وخت کي د دیني علومو عالم هم يي؛ دغه راز په هر کار کي خپل نیتونه يوازي د الله تعالی له پاره وقف کړی او خپلي ټولني ته، لا نور په رښتیني ډول خدمت وکړی. شېخ صاحب د خپلو خبرو په وروستیو کي محصلانو ته بېلابېلي سپارښتني وکړې؛ د نظام ملاتړ ته ئې راوبلل او دغه راز ئې د خپلي وینا په وروستیو کي د ټولو هغو شیوخو کرامو او علماءکرامو څخه ځانګړې مننه وکړه، چي په دغه اووه ورځني سیمینار کي ئې محصلانو ته په بېلابېلو دیني موضوعاتو کي بیانونه وکړل.
وروسته د افغانستان د اسلامي امارت د اقتصادي معاونيت د مرستیال محترم الحاج ملا برادر آخند د مدرسې شيخ الحدیث مفتي نجیب الله منیب صاحب، د هلمند پوهنتون رئېس شېخ الحدیث مفتي محمد شریف الله ابو احمد صاحب او د کندهار د حج او اوقافو ریاست رئېس محترم شیخ الحدیث والتفسیر مولوي عبدالبصیر فائز صاحب هم ویناوي وکړې، دوی د خوارجو د عقایدو، د اسلامي نظام څخه د خروج پر حکم، د وخت پر ارزښت، کار ته پر ژمنتيا، د خواله رسنیو پر مثبت استعمال، د اسلامي سیاست او د اسلامي امارت پر ځانګړتیاؤ هر اړخیز بیانونه وکړل او ګډونوالو ته ئې بېلابيلي سپارښتني او لارښووني وکړې.
د يادولو وړ ده، چي د ياد اووه ورځني سیمینار په تېرو ورځو کي، نورو لسونه (لسګونه) علماءکرامو (د افغانستان د لوړو زده کړو وزارت د دعوت او ارشاد رئېس شیخ مولوي حکمت الله حکمت صاحب، د امربالمعروف او نهی عن المنکر رئېس شیخ مفتي کریم الله فقیر صاحب، د جهادي مدرسو رئېس شیخ الحدیث مولوي عبدالواحد طارق صاحب، د سمع شکایاتو مسئول شیخ الحدیث مولوي عبدالوارث حنفي صاحب، د افغانستان د اسلامي امارت د مرکزي دارالافتاء رئېس شیخ الحدیث مولوي نورالله منیر صاحب، د کندهار ابراهیم النخعي رحمه الله جامعې رئېس شیخ قاضي عبدالصادق غزنوي صاحب، د کندهار د علماء شورا غړی او د امیرالمؤمنین حفظه الله تعالی د دفتر مقام غړی شیخ مولوي امیر حمزه آغا صاحب، د افغانستان د کرهڼیزو علومو او ټکنالوژی ملي پوهنتون رئېس الحاج شیخ مولوي محمد داؤد آغا الهاشمي صاحب او د امربالمعروف او نهی عن المنکر ریاست مرستیال شیخ الحدیث مولوي سیداحمد سعید صاحب) هم د بېلابېلو دیني موضوعاتو په اړه هر اړخيز بیانونه وکړل، چي ګډونوالو ئې له علمي او معنوي پلوه پراخ معلومات ځني ترلاسه کړل او د محصلانو پوښتنو ته ئې جوابونه وویل.
د سیمینار په وروستیو کي ټولو محصلانو ته تصدیق پاڼي ورکول سوې؛ په ژوند کي د لابریالیتوب دؤعاوي ورته وسوې او سیمینار د دؤعا په کولو سره پای ته ورسېد.
نېټه: ۱۴۴۷/۳/۵