انجینېر اکرام الله صهيب د کندهار پوهنتون د مالي او اداري معاونیت له پاره نوى مرستیال وټاکل سو
د دوشنبې په ورځ ماپښین، د کندهار پوهنتون رئېس م. اکرم شاه عاصم د دې پوهنتون د مالي او اداري چارو معاونيت له پاره د لوړو زده کړو وزارت د لزوم ديد پر اساس معرفي سوى نوى مالي او اداري مرستیال، انجينېر اکرام الله صهيب د علمي شورا د غونډو په تالار کښي د رهبرۍ غړو، د بېلابېلو پوهنځیو رئېسانو، اداري کارمندانو او استادانو ته ور معرفي کړ.
د پېژندني یاد مراسم، چي د قرآن کریم د څو مبارکو آیاتو په تلاوت کولو سره پېل سول؛ په سر کښي د کندهار پوهنتون رئېس م. اکرم شاه عاصم وویل: په ادارو کي بدلونونه په دې موخه راځي؛ تر څو کارو ته لا پرمختګ ورکړل سي؛ خو دا په دې معنی نه ده، چي خدای مه کړه مخکنی مسئول ئې وړتیا نه لري؛ ولي دا د مشرانو امر دئ.
م..اکرم شاه عاصم د مالي او اداري چارو مخکنی مرستیال م. عبدالستار حقاني هغه ئې ېو نه ستړى کېدونکى مرستیال وباله؛ د هغه د صداقت او اخلاص او د شپې او ورځي د کارو ستاينه ئې وکړه او زياته ئې کړه، چي هغه یو غوره او بریالی معاونیت وکړ.
ورپسې د مالي او اداري چارو مخکنی مرستیال م. عبدالستار حقاني وويل، چي د اوسني نظام د لزوم ديد پر اساس دې وظيفې ته غوره سوى وو او اوس هم، چي هر ځاى مشران وغواړي؛ کار کولو ته چمتو دئ او د مشرانو په چارو کښې حکمت وباله او وې ويل، چي د ژوند ېوه ثانیه به هم د اولس او نظام د کار کولو پرته تېره نه کړي؛ هغه په کندهار پوهنتون کښي د ریاست مقام او مالي او اداري معاونیت زرغونتیا رامنځته کول، د پوهنتون دننه د درې ګزيانو، عمومي لارو، زرغونتيا او چاپېريال ساتنه، د پوهنتون د نوي دروازې د پاته چارو بشپړه ول، د شپې له خوا د څراغانو نصبول، د ټولو پوهنځيو له پاره د پريزرانو رانيول، د نشراتو په برخه کښي د مجلو د مالي لګښت اجازه ترلاسه کول، د په لکونو – لکونو بېلابېلو پروژو او نورو پوهنتوني توکو د رانيولو قراردادونه، د مالي او اداري چارو معاونيت د رياست مقام د مخ ګلدانونه، د ټرانسپورټ له پاره ځاى او دوه موټران اماده کول ئې د خپلو لاس ته راوړنو ځيني نمونې وبللې او د نوي مالي او اداري مرستيال څخه ئې غوښتنه وکړه، چي په يادو برخو کښي د پاته کارو چاري بشپړي کړي او که اړتيا يي؛ دى ئې هر راز همکارۍ ته چمتو دئ.
په وروستیو کښي، مسئولانو نوي مرستیال خپلو معاونيت ته ور وپېژندی او په چارو کښي ئې د بریالیتوب دؤعاوي ورته وکړې.