په کندهار پوهنتون کي، د قرآن کریم د ختم تراویح اداء سوې
په کندهار پوهنتون کي، د دعوت او ارشاد آمریت په هڅو، د حافظ صاحب مولوي رفیع الله په امامت د قرآن کریم د ختم پېل سوي تراویح اداء سوې. چي په پر مهال ئې، د پوهنتون قدرمن رئېس الحاج شېخ مولوي صاحب عبدالرحمن طیبي، د رهبرۍ محترمو غړو، د پوهنځيو محترمو رئېسانو، قدرمنو استادانو، په سوو محصلانو او عامو خلګو ګډون درلود.
د تراویحو له ختم وروسته، د کندهار پوهنتون قدرمن رئېس، الحاج شېخ مولوي عبدالرحمن طیبي صاحب، د روژې د فضیلتو او ثوابو په اړه تفصیلي خبري وکړې؛ هغه وویل: د روژې نیولو اجر ېوازي الله تعالی ته معلوم دئ او روژهنیوونکي ته بېحسابه ثواب ورکول کېږي.
شيخ صاحب زیاته کړه، چي د روژې آخیري لس ورځي ډېر اهمیت لري؛ ځکه چي لیلة القدر پکښي سته؛ که څوک په دې شپو کښي عبادت وکړي؛ الله جل جلاله به ستر اجر ورکړي.
محترم شېخ صاحب د تراویحو لمونځ د اهمیت په اړه هم خبرې وکړې او وې ویل؛ که څوک دا لمونځ په اخلاص او سم ډول سره ادا کړي، الله تعالی به ئې ټولي ګناوي ور معاف کړي او الحمدلله، دا د ویاړ ځای دئ، چي په کندهار پوهنتون کي سلونو استادانو، محصلانو او کارکوونکو، د قرآن کریم د ختم تراویح اداء او خلاصي کړې؛ ښاغلي طيبي صاحب زياته کړه: د ېوه شرعي آمر د موجودیت برکت دا هم یي، چي خلک عبادت ته متوجه کېږي او ډېر عبادت کوي.
شېخ صاحب په وروستیو کي له ټولو ګډونوالو وغوښتل، چي خپل عالیقدر امیرالمؤمنین شېخ صاحب حفظه الله ته دؤعاوي وکړي او له کفارو څخه د فلسطین د مسلمانانو له ظلمه څخه د خلاصون دؤعاوي وکړي. وروسته جوړ سوي مراسيم، د دعوت او ارشاد آمريت د محترم آمر مولوي فضل احمد فضلي صاحب و ټولو مسلمانانو ته د بریا، کامیابۍ او مغفرت په غوښتلو سره پای ته ورسېدل.
نېټه: ۱۴۰۴/۱/۲