د (۱۴۰۳.ل) کال د کب د میاشتي علمي شورا وسوه
د کندهار پوهنتون د علمي شورا د غونډو په تالار کي، د کندهار پوهنتون د محترم رئېس الحاج شېخ مولوي عبدالرحمن طیبي صاحب په مشري د کب (حوت) د میاشتي، د علمي شورا نوبتي ناسته وسوه، چي پر مهال ئې د رهبرۍ ټول محترم غړي د پوهنځيو قدرمن رئېسان، د ځینو آمریتو محترم آمران او د ټولو پوهنځيو تدریسي مديران حاضر ول.
یاده ناسته چي د قرآن کریم د څو مبارکو آیاتو په تلاوتولو پېل سوه؛ په سر کي د پوهنتون رئېس محترم الحاج شیخ مولوي عبدالرحمن طیبي صاحب د ښه راغلاست تر ویلو وروسته، د قرآني لارښوونو په رؤڼا کي د ښو او بدو عملونو د توپیر په اړه وینا وکړه، چي په خبره ئې؛ الله جل جلاله وايي: ښه عمل او بد عمل هیڅکله سره برابر نه دي؛ څوک چي د بدو پر وړاندي هم ښه وکړي؛ دا په حقیقت کي صابران دي او الله جل جلاله به ستر اجر ورکړي.
محترم الحاج شېخ مولوي عبدالرحمن طیبي صاحب ټینګار وکړ، چي انسان باید خپل کار ته د عبادت په سترګه وګوري؛ که موږ حلاله نفقه ګټو، محصلانو ته تدریس کوو؛ یا بل مشروع کار ترسره کوو؛ دا ټول د الله تعالی د عبادت برخه ده؛ نو راځئ، چي خپل کارونه په لاښه اخلاص، ښه نیت او پوره پاملرني سره ترسره کړو.
وروسته محترم شېخ صاحب د هغه راپور پر اساس د تدریسي مدیرانو ارزوني ته اشاره وکړه، چي څه موده وړاندي د کندهار پوهنتون د علمي چارو د مرستيال محترم پوهنمل دوکتور ضیاءالرحمن مشک عالمزي په مشري ېو هیئت ترسره کړې وه، چي ډېر قدرمن شيخ صاحب د ياد راپور تر اورېدلو وروسته، له تدریسي مدیرانو څخه وغوښتل، چي باید خپلو کارونو ته لا زیاته توجه وکړي، همږغي ډېره کړي، اداري نظم پیاوړی کړي او په ګډه کار وکړي.
ورپسې په ناسته کي د علمي څېړنو معاونیت، د مالي او اداري چارو معاونيت او د محصلانو چارو معاونیت قدرمنو مرستيالانو د خپلو فعالیتو په اړه معلومات له ګډونوالو سره شریک کړل او په ځینو برخو کي ئې خپل راتلونکي پلانونه بیان کړل.
د یادولو وړ ده، چي په یاده ناسته کي، د کندهار پوهنتون، پوهنځيو، آمريتو او عمومي کمېټو د (۱۴۰۳.ل) کال پر عملياتي تطبیقي راپور، د (۱۴۰۴.ل) کال د پوهنتون او يادو برخو پر عملياتي تطبیقي پلان، د (۱۴۰۴.ل) کال پر اکاډيميکي کالینداري (کالهنداري)، د (۱۴۰۴.ل) کال عمومي کمېټو د غونډو د کتابو پر ثبت او تائيدي او دا راز پر ځینو نورو مهمو بېلابېلو مسایلو بحث او خبري وسوې، چي د نظرو تر تبادلې وروسته ئې په اړه مهمي پرېکړي وسوې او تائيد سول.
د ناستي په پای کي د استادانو د علمي ترفیعاتو او انفکاک اسناد وکتل سول، پر ځینو متفرقه مسایلو بحث وسو او ناسته د دؤعا په کولو سره پای ته ورسېده.
نېټه: ۱۴۰۳/۱۲/۲۸