د لوړو زده کړو سرپرست وزیر د کندهار پوهنتون استادانو، کارمندانو او محصلانو ته وینا وکړه
د کندهار پوهنتون په مسجد کي، د لوړو زده کړو سرپرست وزیر، محترم شېخ الحدیث والتفسیر مولوي نداء محمد ندیم صاحب، د کندهار پوهنتون استادانو، کارمندانو او محصلانو ته وینا وکړه، چي پر مهال ئې د کندهار د علماؤ شورا مرستیال شېخ الحدیث مولوي اختر محمد زعفراني صاحب، د کندهار د ابراهیم النخعي ؒ جامعې ریاست رئېس قاضي صاحب عبدالصادق غزنوي، د کندهار د پوهني رياست رئېس مولوي فخرالدين نقشبندي، استادان، اداري کارکوونکي او ګڼ شمېر محصلان حاضر ول.
د غونډي پېل د قرآن کریم د څو مبارکو آياتو په تلاوتولو وسو؛ وروسته د کندهار پوهنتون رئېس محترم الحاج شېخ مولوي صاحب عبدالرحمن طیبي، د لوړو زده کړو سرپرست وزیر ته ښه راغلاست ووایه او کندهار پوهنتون ته ئې د هغه له راتګ څخه مننه وکړه او د پوهنتون د علمي او اکاډيمیک پرمختګ په اړه ئې زياته کړه، چي کندهار پوهنتون د هيواد ېو مهم اکاډيمیک مرکز دئ، چي د افغانستان له بېلابېلو ولایتو محصلان زدهکړي پکښي کوي؛ زموږ استادان د علمي ودي له پاره نه ستړي کېدونکي هڅي کوي او محصلان باید له دې زرین فرصت څخه ډېره ګټه واخلي.
ورپسې د لوړو زده کړو سرپرست وزیر، محترم شېخ الحدیث والتفسیر مولوي نداء محمد ندیم صاحب خپله وینا پېل کړه؛ د روژې مبارکي میاشتي پر فضیلتو، د علم پر ارزښت، د انسان د کرامت پر مفهوم او د اسلامي نظام پر ښېګڼو ئې هر اړخیزه وینا وکړه؛ هغه د روژې د مبارکي میاشتي ارزښت ته اشاره وکړه او وې ویل: دا میاشت د الله تعالی له رحمتو څخه ډکه ده؛ دا د بخښني غوښتلو، عبادت او د روح د پاکوالي غوره فرصت دئ؛ مسلمانان باید په دې میاشت کي د ځان د اصلاح، تهذیب او تربیې له پاره کار وکړي.
همداراز د لوړو زده کړو سرپرست وزیر، محترم شېخ الحدیث والتفسیر مولوي نداء محمد ندیم صاحب د علم پر ارزښت خبري وکړې او وې وویل: دیني او عصري علم دواړه مهم دي؛ هر مسلمان باید هڅه وکړي، چي د خپل مسلک اړوند عصري زده کړې ترلاسه کړي؛ خو د دیني زده کړو ارزښت باید هېڅکله له پامه و نه باسي، ځکه د دؤنیا او آخرت کامیابي د دیني علم په رؤڼا کي ترلاسه کېدای سي؛ هغه زیاته کړه، چي ېو عالم هغه وخت رښتینی عالم ګڼل کېږي؛ کله چي د خپلو مشرانو، همزولو او حتی خپلو شاګردانو څخه زده کړه وکړي؛ علم ېو نه ختمېدونکی سمندر دئ او څونه چي انسان زده کړه کوي؛ هغونه ئې پوهه پراخېږي.
محترم وزیر صاحب د انسان د کرامت موضوع ته اشاره وکړه او وې ویل: چي الله تعالی انسان ته د ټولو مخلوقاتو په پرتله غوره مقام ورکړی دئ؛ هغه وویل: الله تعالی په قرآن کریم کي فرمایلي دي، چي ما انسان ته شرافت او کرامت ورکړی؛ نو انسان باید خپل مسئولیتونه وپېژني، د الله تعالی د حکمو پیروي وکړي او د ټولني د اصلاح له پاره هڅه وکړي؛ همداراز هغه د افغانستان اسلامي امارت د انساني کرامت، اسلامي ارزښتونو او ملي وحدت سمبول وباله؛ چي په خبره ئې د اسلامي امارت ټول قوانین او فیصلې د قرآن کریم او سنتو پر بنسټ ولاړ دي او د نظام پر مختګ ېوازي او ېوازي د قرآن کریم د احکامو په عملي کولو کیږي. وروسته د لوړو زده کړو سرپرست وزیر محترم شیخ الحدیث والتفسیر مولوي نداء محمد ندیم صاحب د عاليقدرامیرالمؤمنین شېخ مولوي هبةالله اخندزاده حفظهالله وینا ته اشاره وکړه، چي ویلي ئې دي: زه د دې نظام حاکم نه یم؛ بلکي زه د دې اسلامي نظام ېو خادم یم؛ د دې نظام یوازنی حاکم الله تعالی دئ.
محترم وزیر صاحب د خپل بیان په وروستیو کي محصلانو ته سپارښتنه وکړه، چي د خپلو زدکړو ارزښت وپېژني او علم ته لومړیتوب ورکړي؛ هغه استادانو ته هم لارښوونه وکړه، چي د محصلانو په روزنه کي لا ښه اخلاص وکړي؛ ځکه چي دا محصلان زموږ له پاره ېو امانت دئ؛ بايد روزني ته ئې ښه پام وکړو.
د غونډې په وروستیو کي د کندهار د علماؤ شورا مرستیال، شېخ الحدیث مولوي اختر محمد زعفراني صاحب، هم وینا وکړه؛ هغه محصلانو ته سپارښتنه وکړه، چي ګورئ محصلانو پر تاسي د نظام ډېره سرمايه مصرفيږي؛ تاسي باید ډېره خواري وګالئ؛ په پوره توان سره خپل ځانونه د کمال تر کچي ورسوی؛ خپلو علمي مسئولیتو ته ښه پام وکړی؛ ځکه اوس د پوهنتونو او دیني مدرسو ترمنځ توپیر نسته؛ ټول د اسلامي امارت تر واک لاندي د علم خدمت ته ژمن دي.
وروسته غونډه د دؤعا په کولو سره پای ته ورسېده.
نېټه: ۱۴۰۳/۱۲/۲۵