په کندهار پوهنتون کي د بدني روزني کلب جوړ او پرانيستل سو
د کندهار پوهنتون د محصلانو د خدماتو او همږغۍ آمریت په هڅو، د ياد پوهنتون د لیليې په نوي تعمير کي د بدني روزني کلب پرانیستل سو، چي په همدې اړه جوړو سوو مراسمو کي، د پوهنتون محترم رئېس الحاج شېخ مولوي عبدالرحمن طیبي صاحب، د رهبرۍ ټول محترم غړي د پوهنځيو قدرمن رئېسان، د ځینو آمریتو محترم آمران او محصلان حاضر ول.
په دې اړه جوړو سوو مراسمو کي د محصلانو د خدماتو او همږغۍ آمریت اړوند د ورزش عمومي مدیر جمیل احمد همت د ياد کلب په اړه وویل: دا کلب د ېو میلیون افغانیو په ارزښت جوړ سوی، چي پکښي ۲۹ د بدن جوړولو Bodybuilding)) ماشینونه او ۱۰ د فټنیس Fitness)) ماشینونه ايښوول سوي دي؛ په دې کلب کي په ېو ساعت کي ۵۵ کسانو ته د ورزش کولو زمینه برابره ده، چي د ورځي ټول ۵۵۰ کسانو ته د ورزش کولو فرصت سته؛ هغه د کندهار پوهنتون له رهبرۍ څخه د منني ترڅنګ، د دې کلب جوړېدل د محصلانو له پاره ېوه لاسته راوړنه وباله.
وروسته د کندهار پوهنتون محترم رئېس الحاج شېخ مولوي عبدالرحمن طیبي صاحب د ياد کلب پر جوړېدو خوښي وښودله او وې ویل: هر کار چي د همږغۍ، اخلاص او ښه نیت پر بنسټ وسي؛ حتماً مثبته نتیجه لري؛ هر چا چي د دې کلب په جوړېدو کي برخه اخیستې يي؛ الله جل جلاله دي ټولو ته اجر ورکړي.
ښاغلي شېخ صاحب زیاته کړه: پوهنتون د ېو کور حیثیت لري او موږ ټول مسئول یو، چي د پوهنتون د پرمختګ له پاره په خپله برخه کي را سپارل سوی مسئوليت په ښه ډول ترسره کړو؛ الحمدلله، اوس د محصلانو د منظم تدریس تر څنګ د پوهنتون بیارغوني او پرمختګ ته هم ځانګړی پام سوی.
وروسته په مراسمو کي د ښووني او روزني پوهنځي د بدني روزني څانګي استاد پوهنیار کريمداد شریفي، د ورزش دیني، روغتیايي او فزیکي ګټو په اړه تفصيلي خبري وکړې او وې ویل: ورزش ېوه داسي مهمه پدیده ده، چي انسان ته خوښي وربخښي، رواني فشار کموي او بدن سالم ساتي؛ لکه څنګه چي ویل کېږي: سالم عقل په سالم بدن کي دئ.
ښاغلي شريفي د اسلام له نظره د ورزش ارزښت ته هم اشاره وکړه او وې ویل؛ چي د قرآن کریم او نبوي احادیثو له مخه، انسان باید خپل بدن ته پام وکړي، ځان روغ وساتي او د فزیکي فعالیت له لاري د بدن ځواکمن ساتلو ته لومړیتوب ورکړي.
د مراسمو په پای کي ګډونوالو د کلب له تجهیزاتو لیدنه وکړه او وروسته مراسم د دؤعا په کولو سره پای ته ورسېده.
نېټه: ۱۴۰۳/۱۲/۲۹