څېړندوی شېرشاه رشاد 

څېړندوی شېرشاه رشاد دعلامه پوهاند عبدالشکور رشاد زوی په ۱۳۴۰ ل کال په کندهار ښار کي زېږيدلی، خپلي لومړنۍ او منځنۍ زده کړي ئې په کندهار او کابل کي بشپړي کړي او لوړي زده کړي ئې دماسټرۍ تر درجې پوري دپخواني شوروي  اتحاد د آذربايجان دباکوښار په عزيز بېکوف انستيتوت کي دجيولوجي په رشته کي دماسټرۍ تر درجې پوري په ۱۳۶۵ل (۱۹۸۶) کال کي  بشپړي کړي دي.ترفراغت او دعسکرۍ ترخدمت وروسته په ۱۳۶۹ ل کال کي دافغانستان دعلومو اکاډيمۍ دځمکني علومو دمرکز دجيولوجي انستيتوت دعلمي غړي په توګه رسمي دندې ته وګمارل سو، خو د۱۳۷۱ ل کال دکابل  خونړۍ پېښو او تنظيمي شخړو دکابل پراوسېدونکو دعادي ژوند کړۍ تنګه کړله او هريوه هڅه کوله له خپلي کورنۍ سره له کابله پښې سپکي کړي. په دې بدمرغه لړۍ کې رشاد صاحب هم اړسو ، څو دپرديو هېوادونو دمهاجرت ناخوالي او تنګدستۍ پرځان يوسي، دڅه مودې له پاره په پاکستان او بيا ترهغه وروسته په جاپان کي د مهاجرت شپې تېرولې. هلته ئې دجاپاني ژبي تر زده کړي وروسته په ۱۹۹۶ کال کي په يوه جاپانۍ کمپنۍ کي د(Geographical information system )G.I.S  په دنده بوخت سو، په ۲۰۰۱ کال کي دتوکيو پوهنتون داسيايي – افريقايي ژبو دزده کړي په څېړنتون کي دپښتو ژبي دښوونکي (Native lecturer) په توګه وګمارل سو اوله ۲۰۰۲ کاله راهيسي داوږدو کلونو له پاره دافغانستان دروغتيا او پوهني دبرخو دبيا رغوني په برخه کي دجاپانۍ نادولتي موسسې (KAREZ) دمشر په توګه دنده سرته رسوله . په ۱۳۸۷ کال کي هېواد ته ترراستنېدو وروسته دنورو بوختياوو په څنګ کي ئې دکندهار پوهنتون افتخاري استادي هم ومنله او په ۱۳۹۲ کال کي دکندهار پوهنتون دسولې او عدم تشدد دفلسفې دڅېړنتون ( پاچاخان علمي څېړنيز مرکز) درئيس په توګه وګمارل سو اود ۱۳۹۵ کال په پای کي دهمدغه پوهنتون دسرپرست علمي مرستيال په توګه وټاکل سو.دهېواد دورځپاڼو ،مجلو، راډيو او تلويزون سره پر ژورناليستيکي کارونو سربېره ، له روسي او انګريزي ژبو څخه په ژباړه ، دجاپاني او افغاني ژبو دمکالمو  دلارښودونو (Conversation Guide ) په ليکنه ، دهېواد دشمالي سيمو دګازي کانو نو او دټول هېواد د منرالي اوبو دسرچېنو په اړه په څېړنه کي څه ونډه اخيستې ده . دافغانستان داقتصادي پرمختيا دپاريس دنړۍوال کنفرانس په ګډون په څو نورو کورنيو او دباندنيو کنفرانسونو اوسيمينارونو کي دبرخي اخيستني په څنګ کي ډېر علمي سفرونه هم کړي دي او په ۱۳۹۴ کال کي دعلامه سيد جمال الدين افغان په لوړ دولتي نښان هم وياړل  سوی دئ.