د کتاب ارزښت اکاډيمي مسئولانو او شاګردانو په کندهار پوهنتون کي نيالګي کښېنول
/۱۹ شعبان / ۱۴۴۴
د پسرلي په رارسېدو سره؛ نن یکشنبه د کتاب ارزښت اکاډيمۍ مسئولانو او د ابتدائیه دورې با احساسه زده کوونکو د کندهار پوهنتون د چاپيريال ساتني د کمېټي د مسؤل پوهنمل عطاء الله محمدي سره ېو ځاى؛ د کندهار پوهنتون د زرغونتیا له پاره لسګونه نیالګي په کندهار پوهنتون کې کښېنول.
د کتاب ارزښت اکاډيمي مسؤلانو وويل، چي پاک، ښکلی او ښېرازه چاپیریال د اکاډيمیکو ماحولو مؤثریت زیاتوي؛ نو ځکه ئې د چاپیریال د ساتلو، عامه پوهاوي او په زده کوونکو کي د ملي او اسلامي احساس د ژوندي کولو په خاطر؛ نن ورځ د ابتدائیه دورې شاګردان د نیال کښېنولو له پاره کندهار پوهنتون ته راوستل.
وروسته شاګردان کتابتون، لابراتوار او د ښووني او روزني پوهنځي د پښتو ژبي او ادبياتو او انګرېزي څانګو ته بوتلل سول او ښاغلي محمدي و پوهنيار احمدظاهر ولي هغوى ته د يادو څانګو په اړه لنډ معلومات ورکړل؛ ورپسې شاګردانو لابراتوار وکوت او بيا د علامه حبيبي کتابتون ته بوتلل سول.
د یادي اکاډيمي مسؤل زياته کړه چي تل کوښښ کوي په زده کوونکو کـې ملي او اسلامي احساس ژوندی وساتي.
د کندهار پوهنتون د زرغونتيا او چاپېريال ساتني کمېټې مسئول ښاغلي محمدي د کتاب ارزښت اکاډيمي له مسئولانو او زده کوونکو څخه، چي د پوهنتون چاپېريال خپل چاپېريال بولي او خپل زده کوونکي په اسلامي او ملي احساس باندي روزي؛ مننه وکړه.
په پاى کښي د کتاب ارزښت اکاډيمي مسئولانو او شاګردانو د کندهار پوهنتون د ادارې له مرستي څخه مننه وکړه، چي هغوى ته ئې د يادو ځايو د ليدني او معلوماتو په ورکولو په برخه کښي وکړه.