د طب پوهنځي څخه په عملي او نظري زده کړو سمبال ۸۷ ډاکټران فارغه او ټولني د خدمت په موخه وړاندي سول
د یکشنبې په ورځ، د کندهار پوهنتون له طب پوهنځي څخه ۸۷ محصلان د شپږ کلن تحصیلي مزل وروسته فارغ سول؛ چي په همدې موخه یاد پوهنځي د فراغت شانداره مراسم ور ته جوړ کړي ول، چي پکښي د کندهار پوهنتون مسئولانو، استادانو، علماؤ او د فارغو محصلانو د کورنیو غړو برخه اخیستې وه.
غونډه چي د قرآن کریم د څو مبارکو آیاتونو په تلاوتولو سره پېله سوه؛ په سر کښي، د کندهار پوهنتون رئېس م. اکرمشاه عاصم ټولو فارغانو ته مبارکي وویله او وروسته ئې په خپلو خبرو کي وویل؛ د اشغال پر مهال مو بدبختانه ټول علمي آدرسونه د غربي نړۍ تر تاثیر لاندي وه؛ خو اوس الحمدالله ټول آدرسونه خپلواک او آزاد دي او د اسلام او شرعي نظام د اُصولو مطابق پکښي ځوانان زدکړي کوي.
ښاغلي عاصم د خپلو خبرو په وروستیو کي د طب پوهنځي د ټولو استادانو هڅي وستایلې او زیاته ئې کړه، چي د روغتیا په برخه کي په دونه لوړه کچه ډاکټران فارغېدل او بیا ټولني ته وړاندي کول دا د ټول افغانستان له پاره د ویاړ خبره ده، چي په خبره ئې، په ښوونه او روزنه سمبال ځوانان د یوې ټولني د ملا تیر دي؛ نو تاسي ټول فارغ ډاکټران هم ددې ټولني د ملا تیر یاست.
د کندهار پوهنتون د طب پوهنځي رئېس ډاکټر نجیبالله رحیمي بیا د طب پوهنځي پر تاریخي اړخ، فعالیتو او راتلونکو پلانو خبري وکړې، چي په خبره ئې؛ د کندهار پوهنتون د طب پوهنځي په تېرو ۲۶ پړاونو کي ۱۴۸۷ نارینه او ښځینه ډاکټران په مسلکي ډول روزلي او بیا ئې ټولني ته وړاندي کړي او په خپلو خبرو کي ئې وویل؛ اوس د طب پوهنځي په بېلابېلو برخو کي فعالي څانګي لري او عملاً محصلان پکښي روزل کیږي، چي په خبره ئې دا پوهنځي د پنځه کلن سټراټیژیک پلان له مخه به دوی د دوکتورا پروګرام هم پېل کړي.
د فارغو سوو ډاکټرانو د والدینو په استازیتوب ډاکټر اماني خبري وکړې؛ هغه لومړی خوښي وښووله، چي د کندهار پوهنتون له طب پوهنځي څخه د ده د زوی په شمول ۸۷ ډاکټران فارغیږي او عملاً په ټولنه کي خدمت پېلوي. ښاغلي اماني د کندهار پوهنتون له مسئولانو، د طب پوهنځي له مسئولانو او د طب پوهنځي له اُستادانو مننه وکړه، چي فارغو سوو ډاکټرانو ته ئې پوره شپږ کلونه په ښه او مسلکي ډول روزنه ورکړې.
وروستیو کښي د فارغو سوو ډاکټرانو په استازیتوب هم دوو ډاکټرانو خبري وکړې او ژمنه ئې وکړه، چي د اولس له پاره به په پوره اخلاص او امانتدارۍ سره د روغتیا په برخه کي خدمت کوي او له هغه وروسته ټولو فارغو سوو ډاکټرانو ته مسئولانو د فراغت سندونه ورکړل.
یک شنبه: ۱۴۴۵/۷/۳
د عامه پوهاوي او اړیکو آمریت