پېژندنه

د کندهار پوهنتون د طب پوهنځی تدريسي روغتون وړاندي د نظامي روغتون په نامه يو سل او پنځوس بستريزه روغتون وو ، چي د حوزې په کچه ئې روغتيايي خدمات د دولتي او نظامي کارکونکو له پاره عرضه کول. وروسته په ۱۳۸۶ل.کال کي د ولس مشر په فرمان روغتون د دفاع وزارت څخه د لوړو زده کړو وزارت ته تسليم سو .کله، چي تدريسي روغتون د لوړو زده کړو وزارت او کندهار پوهنتون تر رهبرۍ لاندي خپل فعاليتونه پيل کړل نو په لومړي وختو کي ئې خدمات د امکاناتو د کم شتون په خاطر ډير محدود وه ليکن اوس مهال د طب پوهنځی تدريسي روغتون د يو لړ هڅو په برکت سره د زياتو پرمختګونو شاهد دئ، چي د کندهار پوهنتون د طب پوهنځی د محصلانو د روزني تر څنګ نور روغتيايي خدمات په مختلفو بخشو کي هيوادوالو ته وړاندي کوي.د کادري روغتون اوسنی تشکيل ۷۳ نفره دئ، چي له هغه جملې څخه ۴۶ نفره رسمي او ۲۷ تنه خدماتي کارکونکي دي.د تدريسي روغتون روغتيايي خدمات د سراپا درملني په کچه د داخله، جراحي، اطفال، عقلي عصبي، نسائې ولادي او غاښو د څانګي څخه عبارت دي.همدارنګه د توبرکلوز ناروغانو د معياري درملني له پاره مجهز مرکز جوړ سوی دئ، کوم چي د مختلفو سيمو ناروغان ورته معرفي کيږي او په معياري توګه ئې درملنه سرته رسيږي. همدارنګه د لابراتواري او تشخصيه معايناتو له اړخه هم د روغتون فعاليتونه د اهميت وړ دي، يعني د ځيني مايکرو بيولوژي، سيرولوژي او بيوشميک لابراتواري معايناتو په شمول، د التراساوند، ای سي جي او اکسرې تشخصيه معاينات د روغتون د خدماتو يوه برخه جوړوي.د  بستر ناروغانو په برخه کي د عمومي جراحي، داخله، سترګه، غوږ، پزه او ستوني په برخه کي ناروغان بستريږي او معياري درملنه ئې تر سره کيږي.د بستر ناروغانو د ښه خدمت په موخه د روغتون مشرتابه د کندهار پوهنتون د مالي او اداري معاوينت په مرسته د ناروغانو له پاره د برېښنا اسانتياوي او د ډوډي امکانات برابر کړي دي.همدارنګه د روغتون په ساحه کي د يو مجهز درملتون، د واکسين څانګه او کانتين موجود ديد روغتون د ورځني چارو د لا ښه والي په موخه د کلني مهالويش سره سم د روغتون د اجراييه مديريت، نرسنګ امريت، سرطبابت او بورډ مجلسونه هره مياشت دايريږي.هيله ده ، چي په نژدې راتلونکي کي به روغتون د سل بستره ناروغانو د درملني امکانات ولري ، چي په دې سره به د ولايت او سيمي په کچه د ډيرو کسانو روغتيايي ستونزي حل سي.

لېرليد

د کندهار پوهنتون د طب پوهنځی تدريسي روغتون به د روغتيايي خدماتو، تدريس او کلينکي څېړنو له اړخه د هيواد په کچه يو غوره او پېژندل سوی روغتون وي.

ماموريت

خپل لېرليد ته د رسيدو په له پاره:

  • په مناسبه کچه د بې وزلو هيواد والو له پاره روغتيايي خدمات وړاندي کول.
  • د طبابت په مختلفو رشتو او ساحو کي د طبي او مسلکي کارکونکو روزل.
  • د تدريس او روزني د هدف تر څنګ د طبي او کلينکي څېړنو سرته رسول ځکه د دوی ترمنځ اړيکه زموږ له پاره نه بېليدونکې ده.

خپل لېرليد ته د رسيدو له پاره موږ لازمه ګڼو ، چي د ټولني غوښتني و پېژنو او د نورو روغتيايي ادارو سره په همکارۍ خپل هدفونه تر لاسه کړو.