پوهنمل مجتبي معنوي د عيسي محمد زوی په (۱۳۶۲ل)کال کي د کندهار ولايت د ډنډ ولسوالۍ د ماشور د کلي په يوه متدينه او روڼ اندې کورنۍ کي دې نړۍ ته سترګي پرانستې.لومړنۍ زده کړي ئي د کابل د قرغي ابتدايه مکتب کي سرته رسولي او ثانوي زده کړي ئې د کندهار ولايت په البيروني او اوسنۍ ظاهر شاهي عالي لېسه کي پاي ته رسولي دي. نوموړي په (۱۳۸۸ل)کال د کابل پوليتخنيک پوهنتون د الکتروميخانيک پوهنځي د تامين برق له څانګي څخه په علمي کادر کي فارغ او په (۱۳۸۹ل)کال کي د کندهار پوهنتون په انجنيري پوهنځي کي د استاد په صفت په علمي کادر کي شامل سو.په (۱۳۹۴ل)کال د تايلند هيواد د آسيايي ټنکنالوژۍ له انستيټيوت (Asian Institute of Technology) څخه د انرژۍ په پوهنځي کي د بريښنا د سيسټم او مديريت په برخه کي ماسټري ترلاسه کړې ده.دا چي ښاغلی معنوي د مشرتابه، مديريت، کار کولو لوړ قابليت لري، او د تخنيکي تحليل د ښې وړتيا څښتن دئ، نو ځکه د کندهار پوهنتون د انجنيري پوهنځی د رهبرۍ لخوا لومړی د سيول څانګي آمر، ورپسې د انجنيري پوهنځی مرستيال او بيا په (۱۳۹۵ل)کال کي د پوهنځی د رئيس په توګه وټاکل سو او تر اوسه د پوهنځی د رياست دنده مخته وړي.ښاغلي معنوي د پوهنځی د رياست تر څنګ د لوړو زده کړو د بهرني ارزونکو د ټيم يو فعال غړی هم دئ، چي تر اوسه ئې د هيواد په کچه د بېلابيلو دولتي او خصوصي پوهنتونونو د کېفيت څخه د لوړاوي په برخه کي ارزونه کړې ده.